الحب أم الصداقة..!!؟؟

.

أنا سلمى مشكلتى بدأت من كام شهر بالتحديد من أول ما أشتغلت فى شغلى الجديد
ليا صديقة عمر أسمها لميا أصحاب جدا من أيام لما كنا مع بعض فى المدرسة مرورا بالكلية ولحد الوقت اللى بحكيلكو فيه بنتشارك كل حاجة بنحكى لبعض كل حاجة بتشورنى وبشورها دايما

من فترة أتعرفت لميا على زميل جديد عندها فى الشغل كان لسه منقول عندهم والمعرفة بينهم تطورت لصداقة جميلة أوى خلتها تاخد بالها من كل مميزاته وعيوبه وهو كمان كان بيبادلها نفس الأرتياح وبيتكلم معاها كتير وبياخد رأيها فى حاجات كتير وبما إنهم كانو بيقضو معظم وقت اليوم مع بعض دة خلى لميا ميقفش إحساسها لحد الصداقة لما بدأت تحس إنو شخص رائع جدا وزاد إعجابها بيه

ولأننا كنا دايما بنتكلم مع بعض كان معظم كلامها عنه وعن مدى الراحه والحب اللى هى بتحسو معاه بالرغم من إن هو مازال بيعاملها عادى كأصدقاء ومش أكتر
وكنا دايما نقعد نفكر مع بعض ممكن تعمل إيه عشان تحاول تعرف إذا كان بيكن لها أكتر من كدة أو لا أو إزاى ممكن تخليه ياخد باله من كدة بطريقة مهذبه متجرحهاش و نقعد بالساعات نتكلم عنه وعن مميزاته وعن كل حاجة وفى نفس الوقت بما إننا أنا وهى أصدقاء أوى فكانت بدورها بتحكيلو عنى

فى يوم جت لميا وقالتلى إنهم فى الشركة عندها عاوزين حد يشتغل لأنها كانت عارفة إنى مكنتش مبسوطة فى شغلى وبالفعل رحت وإتقدمت وأتقبلت وإجتمعنا تانى أنا ولميا بس المرة دى فى شغل واللى كان مكتبى جمب مكتبها تمام وبدورى إتعرفت على مصطفى - اللى عليه العين - واللى كنت أنا تالتتهم فى المكتب وطبعا مكنش صعب نتعرف على بعض أنا ومصطفى بحكم ما هى حاكيه لكل واحد فينا عن التانى

بعد فترة من شغلى معاهم بدأت أحس من مصطفى بحاجات كانت عاملالى حاله غريبة فى الاول وعلامات استفهام كتيرة لحد ما أبتدت تتوضح الأمورحبه حبه واللى حسيت منو أن فى إعجاب تخطى الصداقة ولأن مصطفى شخص فعلا رائع حرك عندى مشاعر كانت بتشدنى له واللى كنت دايما بقاومها وأحاول أفوق نفسى وأقول مستحيل ... مستحيل دة بالذات ودة طبعا لمعرفتى بكل اللى كانت بتكنه لميا لمصطفى واللى حسيت إنها حاسه باللى حاصل بالرغم من إنو مكنش بيلمح بأى حاجة ليها بالرغم من صداقتهم

لحد ما جه اليوم وحصل معايا اللى مكنتش أتخيله فى حياتى واللى إتمنتو سلمى من لحظة ما اتعرفت على مصطفى لما جه وصارحنى إنو بيكن لى مشاعر حب جميلة أوى وإنو طالب إنى أفكر فى إمكانية الأرتباط
وفى اللحظة دى اختلطت عندى مشاعر كتيرة جدا مشاعر فرحه بنت بمصارحه شخص رائع زى مصطفى بمشاعره بالرغم من محاولتها مقاومة كل إحساس بأى إعجاب كان بيتولد جواها – بس دة طلع بيحبنى - ومشاعر لوووووم وأتهام لنفسى بالخيانة مع إنى عمرى ما خنت ويوم لما أخون أخون أقرب صديقة ليا

ومن لحظتها وأنا مش عارفه أبص فى عين صديقة عمرى واللى بحس إن بصاتها ليا كلها لوم وكأنها عارفة اللى حاصل
طب أعمل إيه أضيع صديقة عمرى بالرغم من إنه مش حاسس بيها
ولا أضيع حب ممكن يكون فرصة فى حياه الإنسان مبتجيش إلا مرة

_________________

السؤال بقى

تفتكروا ممكن سلمى تعمل اييييه ....؟؟؟

ماذا لو..؟؟

حصل الموضوع دة بين شابين برضو ممكن تعمل اييييه ...؟؟

دى فكرتنا ودة اللوجو بتاعنا

أوقات كتير كانت بتمر علينا مواقف ومشكلات وكنا مش بنبقى عارفين نتصرف فيها إزاى سواء لأننا محتارين بنفكر كتير وعندنا أختيارات كتير أو معندناش خبره كفاية عشان نتصرف فى الموقف ومحتاجين لحد يساعدنا أو يتكلم معانا
محتاجين نصيحه أو حل أو حتى مشورة وممكن فى بعض أمور كنا بنبقى محتاجين أكتر من رأى عشان نشوف أقرب رأى نرتاح له ونحس أن هو دة اللى محتاجينه

ونقعد نسأل ونسأل .. فى كتير منا محظوظ أنو كان يلاقى حواليه ناس بيحبوه أو حتى ناس عادية يقدر يعتمد ويثق فى أرائهم لكن كان فى ناس كتير برضو للأسف مش بيتاح ليهم الفرصة دى يا إما بسبب أن مش حواليهم ناس يقدرو يخدو رأيهم أو لأنهم فى الأصل ممكن يخجلو أنهم يطلبو رأيهم

غير كدة وكدة حلو أننا نعرف أحيانا الناس بتفكر إزاى بمعنى أن الخبرة هى أن الواحد يتعلم من الدنيا والناس ويستفيد من خبرات الأخرين لأن دة أكيد بيوسع مجال فكر الإنسان زائد أنو ممكن يفتح له مجالات جديدة للتفكير هو كان عمره ما هيفكر أو يتخيل أنها موجودة

كل اللى أحنا هنعملو هنا أننا هنتعرض لبعض موقف و مشكلات قابلتنا أو ممكن تقابلنا ونسيبها مفتوحه النهاية من غير حل أو حتى رد فعل عشان نسمع من بعضنا إزاى ممكن تكون تصرفاتنا و ردود أفعالنا فى المواقف دى يمكن زى ما قولنا حد يستفاد أو يلاقى الرأى اللى يريحو لو حصل إنو أتعرض لنفس الموقف ويمكن كمان فى بعض أوقات يقرب وجهات النظر اللى دايما مختلفة بين الجنسين

وأنتو كمان لو شايفين أنكو محتاجين للمشاركة أبعتولنا وأحكولنا الموقف أو المشكلة على الميل بتاعنا مهما كنتو شايفين أنها ممكن تكون بسيطة من وجه نظر اللى حواليكو بس كفاية أنها كانت فى يوم شاغله جزء من تفكيركو وأحنا هنعرضهالكو هنا من غير نهاية زى ما قولنا ونسيب الناس هى اللى تتفاعل مع بعضها والحل يكون منها ونضمنلكو طبعا الأمانة والسرية التامة لكل إيميل هيوصلنا

يلا مستنيين أرائكم وتفاعلاتكم وإيميلاتكم
فريق ماذا لو ...؟
Maza lw team